ALOFA’AGA MO NAI O MATOU AIGA, NUU MA LE ATUNUU UA PAGĀTIA I LE GALULOLO 30 Setema 09 i le fitu i le taeao, ae fa’alogoina loa le leo mai Rama Talofa Samoa le atunuu pele, ua pōia fa’amanuiōfaga Se tala fa’amomoiloto ua logo ai Aotearoa ma ua fa’amanu’alia ai uma o agaga Mafuie ma galulolo malolosi ua tafi esea ai a’ai ma fano ai le faitau selau o tagata. Talofa i le atu Aleipata, Faleālili, Siumu e agai mai i Safata ma Lefaga Sa lilo i manatu, o le ā āfea e le to’asā o le moana o outou afioaga
Le matalasi o tou siosiomaga, sa fai ma mata’aga i le tele o tausaga Le sami tioata ma le oneone sinasina, ua fai nei ma tu’ugamau o le tele o agaga Fesili atu i mauga o Salaia ma Salāfai pe na tou silafiaina Se fa’ailoilo o se mala o le a o’o mai, i si o tatou atunu’u peleina? Manulele o le vao, manu vaefa ma manu fetolofi, pe tou te lei i’ite foi? Auā o le soifuaga nei, e lē misi ma se fa’aataata mai o se mea moni. A’o le masina foi, sa susulu matagofie i le po ua tuanai Pe sā e pulapula alofa mai, ma fa’atofā mai i foliga lalelei o le ā matafi Talofa i ataata o le la o le taeao manino, na vave ona sulugia ai le a’ai Pe ana lē seanoa lou vave mai, Talofa! e fano uma i latou ae le’i alafa’i mai Aue! le fatu ua nutimomoia ma loimata ua le matū Leai se tasi na sāuni, ua mou fa’afuasei atu lava ma le gūgū O lagona lē mautonu o i matou nei, ua gotouga i le loloto o le moana Le Atua, ua na o oe lava e fa’amafanafana i ō matou mafatiaga Ua peia nei le taualuga o Manu’a, Samoa e i lau fa’asausauga Le Ao o le Mālo, le aufaigaluega, Le Palemia ma le Kapeneta Itumālō ma alalafaga aemaise aiga o lo’o ua ufitia i loimata o fa’anoanoaga Ia tatou moli talosaga nei ina ia fa’asaoina o latou agaga. Samoa ia aua nei tatou fesiligia pe fa’aseā i le mamana o ana galuega O le tatou olaga ua uma ona i ai ona aulape ma vaevaega Ia noa ona tu’uaia o se mala ae o se tofotofoga i o tatou tagata Fa’amausalī ai lagona e i ai le taimi e ave fa’agaoi ai o tatou agaga Amuia foi i latou ua mapu atu mai faigatā o lenei olaga A’e ua ofoofota’i e le au agelu ma fa’aulufale atu i le fa’aolataga Parataiso le tatou nu’u moni e lē toe iloa ai se loimata Na o pēsega mālie ma viiga i mea Aupitoaluga, e fa’amalie agaga. Aiseā ea lā tatou te fa’anoanoa ai pea? Pe lē o le tatou iuga uma lava lea? Ua muamua i latou e sauni ma fa’atalitali mai Se aso oi luma tatou te toe feiloai fiafia ai, i luma o le tatou Matai. E ui lava ina ua matagitaumuaina le tatou sā Samoa i lenei tausaga Ia aua lava nei galo ua nā o se fuga o le vao o tatou olaga Ae ia tatou fa’atuatua pea ma loto tetele E leai sē tasi e taumāsina ma le finagalo o le Silisili Ese Auā o le ti’a e le seua o le tā foi e le agaia lona finagalo E fa’i le moto e tau foi le pula, o Ia e aumai mo toe aveese i so’o se aso. Tusia: Mrs R. Lafaele-Uili Kolisi Tangaroa.Aukilani
30 Setema 09 i le fitu i le taeao, ae fa’alogoina loa le leo mai Rama
Talofa Samoa le atunuu pele, ua pōia fa’amanuiōfaga
Se tala fa’amomoiloto ua logo ai Aotearoa ma ua fa’amanu’alia ai uma o agaga
Mafuie ma galulolo malolosi ua tafi esea ai a’ai ma fano ai le faitau selau o tagata.
Talofa i le atu Aleipata, Faleālili, Siumu e agai mai i Safata ma Lefaga
Sa lilo i manatu, o le ā āfea e le to’asā o le moana o outou afioaga
Le matalasi o tou siosiomaga, sa fai ma mata’aga i le tele o tausaga
Le sami tioata ma le oneone sinasina, ua fai nei ma tu’ugamau o le tele o agaga
Fesili atu i mauga o Salaia ma Salāfai pe na tou silafiaina
Se fa’ailoilo o se mala o le a o’o mai, i si o tatou atunu’u peleina?
Manulele o le vao, manu vaefa ma manu fetolofi, pe tou te lei i’ite foi?
Auā o le soifuaga nei, e lē misi ma se fa’aataata mai o se mea moni.
A’o le masina foi, sa susulu matagofie i le po ua tuanai
Pe sā e pulapula alofa mai, ma fa’atofā mai i foliga lalelei o le ā matafi
Talofa i ataata o le la o le taeao manino, na vave ona sulugia ai le a’ai
Pe ana lē seanoa lou vave mai, Talofa! e fano uma i latou ae le’i alafa’i mai
Aue! le fatu ua nutimomoia ma loimata ua le matū
Leai se tasi na sāuni, ua mou fa’afuasei atu lava ma le gūgū
O lagona lē mautonu o i matou nei, ua gotouga i le loloto o le moana
Le Atua, ua na o oe lava e fa’amafanafana i ō matou mafatiaga
Ua peia nei le taualuga o Manu’a, Samoa e i lau fa’asausauga
Le Ao o le Mālo, le aufaigaluega, Le Palemia ma le Kapeneta
Itumālō ma alalafaga aemaise aiga o lo’o ua ufitia i loimata o fa’anoanoaga
Ia tatou moli talosaga nei ina ia fa’asaoina o latou agaga.
Samoa ia aua nei tatou fesiligia pe fa’aseā i le mamana o ana galuega
O le tatou olaga ua uma ona i ai ona aulape ma vaevaega
Ia noa ona tu’uaia o se mala ae o se tofotofoga i o tatou tagata
Fa’amausalī ai lagona e i ai le taimi e ave fa’agaoi ai o tatou agaga
Amuia foi i latou ua mapu atu mai faigatā o lenei olaga
A’e ua ofoofota’i e le au agelu ma fa’aulufale atu i le fa’aolataga
Parataiso le tatou nu’u moni e lē toe iloa ai se loimata
Na o pēsega mālie ma viiga i mea Aupitoaluga, e fa’amalie agaga.
Aiseā ea lā tatou te fa’anoanoa ai pea?
Pe lē o le tatou iuga uma lava lea?
Ua muamua i latou e sauni ma fa’atalitali mai
Se aso oi luma tatou te toe feiloai fiafia ai, i luma o le tatou Matai.
E ui lava ina ua matagitaumuaina le tatou sā Samoa i lenei tausaga
Ia aua lava nei galo ua nā o se fuga o le vao o tatou olaga
Ae ia tatou fa’atuatua pea ma loto tetele
E leai sē tasi e taumāsina ma le finagalo o le Silisili Ese
Auā o le ti’a e le seua o le tā foi e le agaia lona finagalo
E fa’i le moto e tau foi le pula, o Ia e aumai mo toe aveese i so’o se aso.
Tusia: Mrs R. Lafaele-Uili
Kolisi Tangaroa. Aukilani